ನಿಮ್ಮದು ಯಾವ ಸಂಸ್ಕೃತಿ ಮಿಸ್ಟರ್ ಪಾಲೆಮಾರ್?

ಸೋಮವಾರ ಮಾಧ್ಯಮದವರಿಗೆ ಮಾತನಾಡಿದ ಪಾಲೆಮಾರ್ ಹೇಳ್ತಾರೆ - "ಇಂತಹ ಪಬ್ ಸಂಸ್ಕೃತಿ ನಮ್ಮದಲ್ಲ. ನಮ್ಮ ಸಂಸ್ಕೃತಿಗೆ ಭಿನ್ನವಾಗಿ, ಅಶ್ಲೀಲವಾಗಿ ವರ್ತಿಸುವುದನ್ನು ನಾವು ಸಹಿಸುವುದಿಲ್ಲ ". ವಿವಿಧತೆಯಲ್ಲಿ ಏಕತೆ ಸಾಧಿಸಿರುವ ದೇಶ ನಮ್ಮದು ಎಂದು ದೇಶವೇ ಗಣರಾಜ್ಯೋತ್ಸವದ ಸಂಭ್ರಮದಲ್ಲಿರುವಾಗ, ಈ ನೆಲದ ಜನ ಆಯ್ಕೆ ಮಾಡಿದ ಮಂತ್ರಿಯೊಬ್ಬ ಮಾತನಾಡಿದ್ದು ಹೀಗೆ. ನಾವೀಗ ಕೇಳಲೇ ಬೇಕಾದ ಪ್ರಶ್ನೆ - "ಹುಡುಗಿಯರನ್ನು ಹೀನಾಮಾನ ಥಳಿಸಿ, ಅವರ ಮೇಲೆ ಬಲಾತ್ಕಾರ ಮಾಡುವುದು ನಿಮ್ಮ ಸಂಸ್ಕೃತಿಯೇ ಮಿಸ್ಟರ್ ಕೃಷ್ಣ ಪಾಲೆಮಾರ್?"

ಅಮಾಯಕ ಹೆಣ್ಣುಮಕ್ಕಳನ್ನು ಹೀನಾಯವಾಗಿ ಥಳಿಸಿ, ಕೆಮರಾಗಳ ಎದುರು ಅವರ ಉಡುಪುಗಳನ್ನು ಕಳಚಿದ ಗೂಂಡಾಗಳ ವಿರುದ್ಧ ಶಿಸ್ತುಕ್ರಮ ಕೈಗೊಳ್ಳಿ ಎಂದರೆ, ಪಬ್...ಅಶ್ಲೀಲ ಸಂಸ್ಕೃತಿ.. ಎಂದೆಲ್ಲಾ ಉಪದೇಶ ಕೊಡುತ್ತಾರೆ ಈ ಮಂತ್ರಿ. ಇನ್ನು ಈ ನಾಡಿನ ಗೃಹಮಂತ್ರಿ ಹೇಳಿದ್ದೇನು "ನೀವು ಟಿವಿ ಚಾನೆಲ್ ನವರು ಈ ಘಟನೆಯನ್ನು ಅನಗತ್ಯವಾಗಿ ವಿಜೃಂಭಿಸುತ್ತಿರುವುದು ನೋಡಿದರೆ ಇದರ ಹಿಂದೆ ರಾಜಕೀಯ ಕೈವಾಡ ಇದೆ ಎನಿಸುತ್ತದೆ". - ಜವಾಬ್ದಾರಿಯುತ ಮಂತ್ರಿ ನೀಡುವ ಹೇಳಿಕೆಯೇ ಇದು?

ಅತ್ತ ಆ ಜಿಲ್ಲೆಯ ಉಸ್ತುವಾರಿ ಸಚಿವ ಅಶ್ಲೀಲ ಸಂಸ್ಕೃತಿಯನ್ನು ನಾವು ಸಹಿಸುವುದಿಲ್ಲ ಎಂದು ದಾಳಿಕೋರರ ವಕ್ತಾರರಂತೆ ಮಾತನಾಡಿದರೆ, ಇತ್ತ ಗೃಹ ಮಂತ್ರಿ ಘಟನೆಯಲ್ಲಿ ರಾಜಕೀಯ ಹುಡುಕುತ್ತಿದ್ದಾರೆ. ಆಚಾರ್ಯರ ಹತ್ತಿರದ ಸಂಬಂಧಿಕರೊಬ್ಬರ ಮನೆಮಗಳು ಇಂತಹ ಘಟನೆಯಲ್ಲಿ ಥಳಿತಕ್ಕೆ ಒಳಗಾಗಿದ್ದರೆ, ಹೀಗೆ ಮಾತನಾಡುತ್ತಿದ್ದಿರಾ?

ದಿ ಹಿಂದು (ಮಂಗಳವಾರ) ಮುಖಪುಟ ವರದಿ, ಅಂದು ಶನಿವಾರ ಎಮ್ನೇಸಿಯಾ ಪಬ್ ನಲ್ಲಿ ನಡೆದದ್ದನ್ನು ಸವಿವರವಾಗಿ ನಿರೂಪಿಸುತ್ತದೆ. ಶ್ರೀರಾಮ ಸೇನೆ ಹುಡುಗರು, ಕೆಲ ಹುಡುಗಿಯರ ಬಟ್ಟೆ ಎಳೆದಾಡಿದರು, ಮನಸೋ ಇಚ್ಛೆ ಥಳಿಸಿದರು. ಅವರ ಸಹಾಯಕ್ಕೆ ಬಂದ ಹುಡುಗರನ್ನೂ ಬಿಡಲಿಲ್ಲ. ಜೊತೆಗೆ ಇದೆಲ್ಲವೂ ಹೊರಜಗತ್ತಿಗೆ ಗೊತ್ತಾಗಲೆಂದು ಮಾಧ್ಯಮದವರನ್ನೂ ಬರಲು ಹೇಳಿದ್ದರು. ಅದೇ ದಿನ ರಾತ್ರಿ ಇನ್ನೊಂದು ಖಾಸಗಿ ಪಾರ್ಟಿಮೇಲೆ ದಾಳಿಯಾಗಿದೆ. ಆ ದಾಳಿಯ ಹೊಣೆಯನ್ನೂ ಇದೇ ಸೇನೆಯ ಮುಖಂಡ ಹೊತ್ತುಕೊಂಡಿದ್ದಾನೆ. ಹಾಗಾದರೆ ಇದಕ್ಕೆಲ್ಲಾ ಯಾರು ಹೊಣೆ ಎನ್ನುವುದು ಇನ್ನು ತನಿಖೆ ಮಾಡಬೇಕಾದ ಸಂಗತಿಯೆ? ಇಂತಹ ದಾಳಿಗಳನ್ನು ಸಮರ್ಥಿಸಿಕೊಳ್ಳುವ ಪ್ರಮೋದ್ ಮುತಾಲಿಕ್ ಎಲ್ಲಾ ಸುದ್ದಿವಾಹಿನಿಗಳ ದೂರವಾಣಿ ಕರೆಗೆ ನಿಲುಕುತ್ತಾರೆ ಎಂದಾದರೆ, ಪೊಲೀಸರಿಗೆ ಬಂಧಿಸಲು ಏನಡ್ಡಿ?

ಮಾಧ್ಯಮಗಳು

ಡಿಜಿಪಿ ಶ್ರೀಕುಮಾರ್ ಮುಖ್ಯಪ್ರಶ್ನೆಯೊಂದನ್ನು ಎತ್ತಿದ್ದಾರೆ. "ಇಂತಹ ದಾಳಿ ಬಗ್ಗೆ ಮೊದಲೇ ಗೊತ್ತಿದ್ದರೂ, ಮಾಧ್ಯಮದವರು ಪೊಲೀಸರಿಗೇಕೆ ತಿಳಿಸಲಿಲ್ಲ? ನಿಮ್ಮದು ಬೇಜವಾಬ್ದಾರಿ ನಡವಳಿಕೆ ಅಲ್ಲವೇ?"

ಮಾಧ್ಯಮಗಳು ಸ್ಥಳಕ್ಕೆ ಧಾವಿಸುವ ಮುನ್ನ ಪೊಲೀಸರಿಗೆ ಮಾಹಿತಿ ನೀಡಬೇಕಿತ್ತು ಎನ್ನುವುದು ಸರಿಯೇ. ಆದರೆ, ದಾಳಿಕೋರರ ಹಿಂಡು ನಾವೀಗ ಗೂಂಡಾಗಿರಿ ಮಾಡಲು ಹೊರಡುತ್ತೇವೆ ಎಂದು ಊರತುಂಬ ಮಾಧ್ಯಮಗಳಿಗೆ ಹೇಳಿಕೊಂಡು ಬರುವ ತನಕ ತಮ್ಮ ಇಂಟೆಲಿಜೆನ್ಸ್ ವಿಂಗ್ ಏನು ಮಾಡುತ್ತಿತ್ತು ಸ್ವಾಮಿ?

ಮಾಧ್ಯಮದವರು ಜನರಿಗೆ ಸುದ್ದಿ ಮುಟ್ಟಿಸುವ ತವಕದಲ್ಲಿರುತ್ತಾರೆ. They are not police informants.

ಹಿಂದೆ ಇಂತಹದೇ ಅನೇಕ ಪ್ರಕರಣಗಳಲ್ಲಿ ಪೊಲೀಸ್ ನಡೆದುಕೊಂಡಿರುವ ಪರಿ ಮಾಧ್ಯಮದವರಿಗೆ ಬೇಸರ ತಂದಿರಬಹುದು. ಹಾಗಾಗಿಯೇ ಅವರೂ ಪೊಲೀಸರಿಗೆ ಹೇಳುವ ಉಸಾಬರಿಗೆ ಹೋಗಿಲ್ಲ. ಹಾಗೊಂದು ಪಕ್ಷ ಮಾಹಿತಿ ನೀಡಿದ ನಂತರ, ಅಲ್ಲಿ ಆ ಘಟನೆ ಆಗದೇ ಹೋದರೆ - ಎಂಬ ಅನುಮಾನ ಪತ್ರಕರ್ತರಲ್ಲೂ ಇರುತ್ತದೆ. ಹೀಗಿರುವಾಗ ಮಾಧ್ಯಮಗಳಿಗೆ ನೋಟಿಸ್ ಜಾರಿಮಾಡುವ 'ಬುದ್ಧಿವಂತಿಕೆ' ಅಗತ್ಯವಿರಲಿಲ್ಲ.